Karauhan, Sira Sané Rauh?
Sumber : http://www.balipost.co.id/BaliPostcetak/2006/12/17/ort7.html
Redité sané mangkin (17/12) ring Pura Pangrebongan, Kesiman, Dénpasar Timur, kawéntenang upacara Ngrébong. Upacara puniki kasub duaning akéh pisan kramané sané karauhan, ngurek ri tatkala ngiring sesuunan Barong lan Rangda ngiter wantilan. Ring suang-suang Barong lan Rangda wénten kirang langkung dasa diri pepatih sané ngaturang ayah ngurek.
Wilangan punika nénten ja pasti, duaning ri tatkala sesuunan Barong lan Rangda ngiter wantilan setata wénten malih krama pangempon sané karauhan.
Yéning becikang nyingak, ring Ngrébong punika pamargi karauhané wénten tigang palet. Asiki, magenah ring jaba purané, sang sané karauhan mabayu ageng, sakadi anak ngamuk nuek tangkah ragané.
Sané kakalih, ring madia mandala purané, sang sané karauhan nénten ja ngambel keris, nénten ja ngurek, nanging masolah. Sané karauhan majalaran solah lan tangis punika nénten lianan wantah para pemangku.
Sané kaping untat, ring utama mandala purané, wantah karauhan sané pinih alus. Sang sané karauhan wantah para pamangku lingsir sané malinggih ring Baléné. Karauhané wantah abos-bos. Duk punika, sang sané karauhan pacang makenyem kémanten.
“Kerauhan punika malian-lianan santukan sang sané karauhan madué tingkat pengendalian diri sané nénten pateh,” pajar Prof. Dr. LK Suryani, psikiater sané dahat wikan indik karauhan.
“Yéning sang sané karauhan madué tingkat pengendalian diri sané tinggi sinah prasida ngametuang karauhan sané alus punika. Yéning tingkat pengendalian diriné rendah sinah sané metu punika karauhan sané kasar, sané jerat-jerit,” baosnyané.
Punika mawinan sapasira ja sané sering karauhan sapatutnyané malajahin tata cara tur sarana anggén neguhang pengendalian diri.
“Murid-murid titiangé sampun ajahin titiang tata cara mangda prasida karauhan utawi trance sané alus. Ri tatkala karauhan alus punika, sang sané karauhan nénten ja pacang lali tekéning ragané. Sané karauhan tetep prasida uning ring napi sané kabaosang olih Ida sané nedunin,” pajar LK Suryani.
Mangda prasida ngametuang karauhan sané alus, LK Suryani mabarang, sané pacang karauhan sapatutné nénten gagéson ngaturin Ida Sesuunan utawi Sanghyang Embang tedun ka ragané.
“Yéning cacirén utawi cihna karauhan sampun karasayang ring ragané, gelisang ngamargiang pranayama tur ngeningang kayun. Aturin Ida Sesuunan mangda sampunang tedun dumun. Yéning kayuné sampun ening, i rika wau aturin Ida tedun, I rika wau sukserahang ragané, sinah karauhané pacang alus tur mapikenoh,” baosnyané.
Indik cacirén utawi cihna karauhan punika I Madé Tuardi, tapakan ring Pura Banjar Ceramcam lan Pura Blanjong, maosang, “Sakadi toya ngléncok, anggané ngejer keras pisan tur marasa panes.”
Yadiastun yusané kantun anom, tapakan Ratu Madé Sakti puniki sampun pitulas warsa dados tapakan Ida Sesuunan.
Prof. Dr. LK Suryani taler matuéling ring krama Baliné indik jenis karauhan sané wénten kalih palet. Sané kapertama wantah karauhan sangkaning katedunin olih Ida Sesuunan, Sanghyang Embang utawi leluhur. Sané kakalih wantah karauhan sangkaning keni panyungkan, sakadi bebainan utawi penyakit jiwa lianan.
“Wénten malih karauhan sangkaning Buta Kala sané ngranjing ka anggané. Puniki sané kabaos kasusupan,” pajar IGN Sudiana, dosén ring Sekolah Tinggi Agama Hindu (STAH) Dénpasar.
Lianan ring punika, wénten taler sané mapi-mapi karauhan. Makudang warsa sané lintang, ring Gianyar, wénten sané mapi-mapi karauhan mangda polih jabatan ring koperasi désa tur mangda prasida ngasorang mesehné ring désa.
Punika mawinan krama Baliné sapatutnyané ngyatnain karauhan punika.
“Dados percaya ring kawéntenan karauhan, sakéwanten sampunang kalintang percaya ring daging bebaosané,” pajar IGN Sudiana.(ita/iwa/jun)
Subscribe to RSS
